اخترت لكم في وداعة الله بيتنا في الخرطوم (62) حلقات وجدانية بحتة توثق للرحيل المر لاهلنا بالخرطوم والمدن الاخرى بعيدا عن السياسة.

ا.د.زكي مكي اسماعيل
& ان ظننا بالله كبير ولن يخيب..وان بعد العسر يسرا ..وان بشريات النصر وسلامة العودة وجبر خواطرنا..قادمة أن شاء الله…..
# احسنوا استقبال ألاقدار ولا تسخطوا على ماكتب الله عليكم..واشكروه بالحمد على اقداره لانها نافذه وكم من نعمة جاءت في هيئة نقمة وان مع العسر يسرا وعسى أن تكرهوا شيء وهو خير لكم
@ياسلام …أن في الدنيا جنة من لم يدخلها لن يدخل جنة الاخرة..وعلينا أن نرطب السنتنا بذكر الله وقال المولي عز وجل(اذكروني اذكركم) وقال في الحديث القدسي (أنا مع عبدي ماذكرني وتحركت بي شفتاه بذكري..ومن ذكرني بنفسه ذكرته في نفسي)…
علقوا قلوبكم بالله فلن يخذلكم..واذكروه دوما ليكون معكم.
# وفي تواصلنا هذه الحلقة نلتقي بالاخ الحبيب الدكتور على خالد ادريس والذي انتقل قبل سنوات عددا من مستشفيات الدوادمي بالسعودية الى مستشفيات امريكا ولنقراء معا ماكتب لنا من هناك ؛_(صباح الخير ..الاخ والبروف زكى مكى ..ما شاء الله عادت لنا الذاكرة…والحمد لله وربنا يواليك بالصحة
والعافية لتتحفنا بالمزيد من مخزون الذكريات والتجارب المثمرة .د علي خالد امريكا)…
#@ ولاتوقف هنا من صديق ورفيق عمر وغربة تزاملنا زمنا طويلة طلابا ثم موظفين ومغتربين لسنوات وبأكثر من دولة تارة بالسعودية وتارة بالامارات..الا وهو الحبيب الرشيد بري ..وهو الان بمصر وأنا مشتت بين اكثر من دولة خليجية وتشتت ايضا اسرتي كذلك بثلاث اسر والله المستعان ..وهو يسال عن حالي واسرتي عبر الوسائط الالكترونية فاجيبه بالرسالة التالية..؛__(الحمد لله اخي الحبيب.. تعافيت.. ولكن تجدني في توتر مستمر… ونحن من هول هذه الضغوط ..ونحن نتوتر …وننفجر ايضا
…في حالة توتر يشل معه وظائف الأعضاء في الجسم.. الحمد لله…والحمدلله كثيرا..لولا ترطيب لساني يا اخي رشيد بذكر الله دوما لكنت من الهالكين.. وكما تعلم لدي أطفال صغار “شفع” (ناس دنقوش وناس ارهاف والطاف)… كلما اتكلم معهم بتسجيل واسمع تسجيلاتهم “يابوي نحن زهجنا… زهجنا خلاص”..وهم لا يقدرون كيف حال ابوهم ؟..ولا يدورون أن ابوهم يتقطع حينما يستمع الي تسجيلاتهم ويتذكر أنه أصبح كطارق بن زياد حينما أحرق سفنه بأرض الاندلس…”البحر خلفي والعدو أمامي..يا الاهي…لطفك بنا يارب ..اللهم جملنا بصبرك الجميل)..
# نتواصل لليوم التالي براكوبة نيمة حاج الطاهر وقبل أن ننتقل الى الداخل بعد وصول داوود كبوش وابنه العطا ..يبادر الراوي داوود بقوله ؛__(مالك رابط كراعك دي بي شريط ياداوود؟) فيجيب سريعا؛_(ماسحرني الزول الجنبك دة..صديق دة عينه حارة يا دكتور..أنا بعد مرقت منكم مشيت العصر دورت البابور قلت اسقي ليا حوضين تلاتة عندي خضار كنكش بي تحت من العطش.. قلت ارشرشه شوية أن كان يبتق تاني من جديد اليومين الفاتن ديل كانت في ازمة جزلين بلحيل حارة علينا وأنت عارف يادكتور بوخ العين احر من بوخ الاسعار اخوي صديق دة بقيت اخاف منه عديل ..امس بعد نزلت المترفة وأنا افتح في اللبقة الطورية وقعت لها فوق حجر وطارت جاتني في ساقي ربك رب الخير قدر ولطف..
#ويرد عليه صديق؛(عليك الله يا داوو يسحروا فيك شنو كراعك كبيرة بلحيل مركوب مقاس ٥٣ يمكن مايلبسك …اسي عليك الله مركوبك دة كان سووا ليه مقاديف مابيبقى فلوكة…ننزلا البحر.هههه)..ويرد عليه داوود؛_(قبل دة سحرت دحشة العطا ولدي دة يادابه ادبها وركبا..لاقيته أنت في درب السوق ..قلت له دي عجلة وله موتر..في يومه ربطا في عود حمير جانقي ودخل للدكتور وقت مرق لقاها شنقا الحبل ماتت في ساعتا..يازول حجاب الله ياصديق من عينك)..وهنا يتدخل حاج الطاهر ؛_(كدي ندخل لي جوة نتم كلامنا دة جوة ياداوود )..فينهض داوود مرددا ؛-( ارح)..
ويتجه جمعنا الى داخل الحوش والى ذات البرندة…
#ويبداء من جديد الحديث حاج الطاهر بقوله؛_(ياداوود ياخوي نحن عشمنا فيك كبير انك تجبر بي خاطرنا وتجبر بي خاطر ولاد اخوك جابر ديل قبل خاطرنا…والرسول قال عليكم بجبر الخواطر)ويوجه داوود حديثه الى الجميع؛'(كدي صلوا على النبي يا رجالة) ويردد الجميع ” ألف عليه قليل ” يواصل؛_(زيدوا النبي صلاة)”
## ويرددوا (ألف عليه قليل)..يواصل داوود(ياحاج الطاهر ياخوي..جابر الله يرحمه ياهو دمي ولحمي والمثل قال تاباها مملحة تاكلها قروضة..الزول دة مو فاتنا حوفا وقطع عصاته ورووح وأنا شقيت وولدي شقا ورعينا الزراعة دي زي جنانا وهو راقد في الخرطوم تحت المراوح والمكيفات داير يجي بالباردي يشيلا..وكمان كدي أنا افوتا ليهو… الزراعي دي ياها جناي ..أن بقى الزول بفوت جناه فوتوني اياها…دحين أنا اقولكم الحل الفيه العدل حق ابوي دة مو شوية في الساقيتين ..النقعة الاتعمرت دي انسوها وساقية العقبة المعمر فيها شيء بسيط وحق جابر دة قريب التلت والباقي اكتر من النص دحين أنا بدي حقه بالزيادي ايوة بالزيادة ياحاج الطاهر في الأرض الفاضي…تب مابعاوجكم في الفاضي التشوفوه ماشي…) واواصل أنا (ياداوود ياخوي نحن عشمانين وولاد اخوك ديل القسمة وكواسة الحق دي اصله ما جابتهم ..لكن جابتهم السنة الكعبة دي..صلاتك بالنبي ..دحين دي مو سنين يزرع فيها زول تاني عشان ينتظر تاني عشرة وعشرين سنة عشان يحصد وياكل من وراهوا..نحن عشمانين منك في المعمر الجاهز دة..ياخوي وانت مو تتنازل لي زول غريب لا..لكن لي زول دمك ولحمك)…
@ يواصل داوول ( أنا كلمتكم المرة الفاتت انه الربيتو…وسويتو تمر ونقل دة ياهو جناي متل العطا دة.. مابفوتو …لكن السهلة فاضي يشيل منها بالزيادي فوق حقه اديه)وهنا يستلم حاج الطاهر الحديث ؛_( كدي خلوا بالكم معاي ياصديق ويادكتور …واسمعني عليك الله ياداوود نحن بنتكلم معاك عشان تتعادل مع اخوك ودمك ولحمك جابر وعاوزين الرحم يوصل وترجع المحنة وعاوزين جبر الخواطر وعاوزين نمشي بالفضايل القالها الله …الله قال “ولا تنسوا الفضل بينكم”..دحين المعمر دة حقك وشقاك وجناك وبرضه نحن عاوزنك تبقى كريم وتقسم له منه ياداوود كله مال دنيا وزايل والله كلنا فايتين خالنه)..ويقاطعه داوود؛_(كلامك دة شنو ياحاج الطاهر انتوا جايبني هنا عشان تقلعوا حقي وشقاي تدوه لي ولاد جابر اخوي؟!! لكن بعد كلامي دة والله عن طيب خار اقولكم سووا العاوزين تسووه. وحرم خشمي ما افتحه..انتوا مو عاوزين تحكموا بيني وبين ولاد جابر اخوي حرم أن عاوزين تتكوني وتذبحوني وله تذبحوا العطا ولدي أهي دي السكين و “هنا يستل السكين من ضراعه ويرميها امام حاج الطاهر ويرقد علي الأرض وهو يبكي ويتعبر”.. ارقد يا العطا “فيرقد العطا ايضا”…سووا العاوزنه فينا) في قمة التراجيديا. يتمدد داوود وابنه على الأرض…ويتعبر ويبكي الجمع وصديق يبكي بصوت مرتفع..والراوي ايضا يردد ” الله ينعلك يا ابليس.” ويرد عليه حاج الطاهر بصوت متعبر ؛_(حاشا والله ..حاشا والله ياداوود كتر خيرك) وبنبرات باكية (حاشا والله…دة شقاك نعم مابنشيل منه شبر الا يجي منك عن طيب خاطر..أنا ماني عمر بن الخطاب ولا أنا علي بن ابوطالب..أنا جودية… وساعة أخير من ساعة نحن نقيف لي حد هنا ونتلاقى في مكانا دة بعد باكر بعد صلاة العصر وانت قلب كلامنا دة في راسك أن شاء الله تطلع راضي وتدينا العاوزنه عن طيب خاطر..باذن الله.. قوموا علي حيلكم…كتر خيركم…والاعمال بالنيات..وسواتك دي والله سواة صحابا ..مهاجرين وانصار…جزاك الله خير…والى أن نلتقي في الحلقة القادمة(63) لكم كل الحب…زكي مكي اسماعيل