صحيفة سودان بيزنس الاقتصادية صحيفة سودان بيزنس الاقتصادية
ا.د.زكي مكي اسماعيل
ان ظننا بالله كبير ولن يخيب..وان بعد العسر يسرا أن شاء الله تلتئم جروحنا وتنشرح صدورنا.
وان بشريات النصر وسلامة العودة وجبر خواطرنا قادمة أن شاء الله……
(لنا حزن وللرحمن بشرى..جراح في كفوف الله تبرا..تذوب النفس في صمت ولكن..الاهي كان بالمكنون ادرى..سيأتي ربنا من بعد كسر..ليحدث في قلوب الخلق جبرا)…
@ مازلنا نحسن الظن بالله انه قادر على أن يجبر كسرنا ويزيل حزننا…وهو معنا وفوقنا وتحتنا فلن نحزن لأنه معنا…
@ و (مابين غمضة عين وانتباهتها..يغير الله من حال الى حال..)اللهم اكشف عنا وبدل حالنا حتى نرضى…وابداء تواصلي بالحبيب د. مامون ع المنعم .؛_(سلامي واحترامي لك أستاذنا الرائع بروف زكي ولكل المتابعين الأعزاء . حقا انك تتحفنا في كل حلقة بالسرد الجميل الذي يخفف علينا معاناتنا جميعا . والاجمل التوثيق السلس لبعض أبطال الحلقات الأحياء منهم ، والأموات رحمه الله عليهم جميعا . لقد عرفتنا حلقاتك ببروف جاركيل ورواكيبه ، والاستاذ محي الدين شيخ الدين ، وطعم تمر قنديله اللذيذ؛ وذكريات عزق وتنظيف المزارع العبقري القادم من عاصمة الضباب وضواحي الخرطوم مصطفي سعيد ليستقر بمزرعته بكرمكول ، وشيخ كورينا الذي تحول بنصيحة (ابوجاركيل) الحاج سعيد موسي من مزارع محاصيل الى أكثر مزارعي النخيل بالغابة وا. محي الدين شيخ الدين مدير التعليم والمزارع الصمد، والبروف الوزير عثمان أبوزيد المحسي ، والعودة دوما الي راكوبة حاج الطاهر ؛ والخالة هتراشة ( طبج طبج طبج وشيخها ابو حجباتن سبعة ورحلتها الجميلة مع المنام ▪︎▪︎▪︎) دعواتي لك يا بروف ولاسرتك الصغيرة والكبيرة بدوام الصحة والعافية …تحياتي واحترامي ..مأمون عبدالمنعم.)
ومن ارقي والفي الجمال مافي بلدا بتجاكرا..والله مديها سماحة صاح من كروها ولي تكرا..يتاوق لنا الحبيب ع اللطيف شوتال ..محييا ؛_(“طاب مساءكم بالخيرات والبركات ولا تشكو اخوي الاكبر بروف زكي من شتات الافكار نحن “البطان” ديل نشكو شتات البال و بقينا ننضم برانا ومعاه حركة بالايدين وكمان جابت لها تبسم أقرب الى نصف ضحكة:: عاد الله يستر من الضحكة المجلجلة والقرقرة الملفتة فى برندات سوق الدبة::😂😂😂”ع اللطيف شوتال ارقي)…تسلم ودشوتال..وتسلم كل ملوحة التكر….بس خليها حلوة شوية ياخوي سويت نفسك بطان ياخال…!!!
.نعود لراكوبة نيمة حاج الطاهر والتي وعدنا فيها صديق والراوي البروف وداوود كبوش وابنه لنلتقي لنفطر معا مبكرا وندخل بعدها لحوش حاج الطاهر نكمل ما بدأناه من نقاش اول امس حيث كان داوود متهيجا برغم انه اعتذر لصديق لكن حاج الطاهر فضل ختم النقاش حينها..ونحن في تلك الحالة من التوتر الذي احدثه داوود …وقلنا “ساعة أخير من ساعة” وهانحن نوفي بوعدنا بالحضور المبكر..وكان قد اتصل بي بالامس بالجوال داوود قائلا؛_(سلام يابروفنسر تكلم حاج الطاهر تقوله داوود حلف قال جايب الفطور باكر مايسووا لنا فطور ونحن جايين في الموعد والفطور والشاي معانا بس تملوا الصبارة موية باردة) ونقلت بالأمس الرسالة الى حاج الطاهر كماهي…وما ان جلست وصديق لاعلمه بمحادثة داوود.. فكان رده (داوود دة سكينه حمراء والليلة اوعك من يفطرنا بي لحمة جزارة قطع شك من الفجر يكون ذبح وجهز فطوره…يازول ولاد اخوه ديل شبعهم في الذبايح كل اسبوع ذبيحة)..ثم يواصل صديق(يازول ياهو دة وصل بي تكتكه) ويواصل ايضا صديق؛_(أنت عارف ياداوود كرعينك الطوال ديل لو ماكنت بترفعن فوق في التكتك كان يجرن بالارض هههه) ويقاطعه داوود؛_(صديق قول ماشاء الله لا تنجهنا بي عينك الحارة دي) ويقاطعه صديق؛_(عليك الله يسحرواليك شنو..اول حاجة مقاسك في المراكيب مقاسه 51مافي في السوق خالص الا يسوولك مقطع فضل..تخت كراعك ويقطعوا عليها النعال ههههه)…مافي قالب بيقى قدرك..هههههه
ينزلوا من التكتك وينزلوا معهم مجموعة من حلل البريستو متوسطة الحجم واكياس الرغيف ومجموعة حلل وصحون وكيسين كبار تركوهما على ظهر التكتك بعد نزلوا الحاجات كلها الا الكيسين حيث وجه داوود حديثه الى ابنه العطا ؛_(دور تكتكك دة واقيف قدام حوش عمك حاج الطاهر دة ونزل الاكياس دي لي عمتك ام الحسن قولها اللحمة وسوون بيها الغداء اكراما لي بنياتنا ديل ووليداتهم..والفطور اسع جاييكن…وبعد داك قريش تكتكك دة ظهر الراكوبة وتعال..
#وصل سليمان والتيمان الحسن والحسين من جوة وجابوا معاهم الصبارة مليانة موية وصابونة وابريق وبعد شوية وصل ايضا عمك حاج الطاهر… وبالداخل قبلهم كنا نحن بداخل الراكوبة..الراوى وصديق وداوود وابنه العطا..ماشاء الله تمانية رجال ..ونادى عمك حاج الطاهر الى الحسن قائلا؛_(جيبوا تربيزة كبيرة عشان ترفعوأ فيها الصينية دي) وصلت التربيزة وبداء العطا في غرف اللحوم المحمرة والشيات والطبايخ في الصحون الكبيرة والمرارة والسلطات في صحون اصغر وماشاء حتى الشطة جايبنها خضرة وحمراء بالليمون والدكوة ايضا وسلطة دكوة بالطماطم كمان..الصينية اتستفت فل ولسة الحلل الكبيرة مردومة لحم..وطبيخ ولحمة مسبكة..وأنا اردد “ماشاء الله ..الاكل دة كتير”..ويخاطبني داوود” الاكل فضلة خيرك يادكتور وفضلة خير اخونا حاج الطاهر واخونا صديق ..اتفضلوا ..اتفضل ياسليمان والله نحن شقاوة الدنيا والزراعة مو مدانا فرقة..نجي نتونس معاكم..وقبل تقعد يا الحسن ياولدي دخل الحلل ومواعين السلطات دي لي العوين جوة هن كمان اليفطرن)..ويضيف صديق ؛_(ايوة الاكل دة كتير بلحيل)…مكفينا ومكفيهن ومفضل دام فضلك ياداوود..ويقاطعه داوود (فضلة خيركم)
#وبداءنا في تناول الإفطار والذي نسميه نحن معشر السودانيين الفطور..وكان طعاما شهيا علقت عليه ؛_(ياشيخ داوود ماشاء الله بت عبيد ايدا طاعمة واكلها شهي والسلطات التلاتة ديل مافيهن كلام والشطة اجمل والمشاوي واللحوم حاجة ماتخلص..ماشاء الله عليها…وازيدك من الشعر بيت..المراءة الطباخة تعرفا من طعيمها للسلطة كان سلطتها طاعمة أعرف انه ايدا طاعمة)ويعقب داوود(الاكل والطبخ يادكتور حريمكم ياهن ستاته واكلنا نحن في بيتكم في البندر وشفن خدمتن بلحيل سمحي..)وهنا يؤكد حاج الطاهر ؛_(والله يادكتور بت عبيد دي نحن في مناسباتنا اول الشيء بوصي ام الحسن تسلما الملاحات..يا زول اكلها ماشاء الله مافيه كلام)ثم يعلق صديق ؛_(وام الحسن يابروف متخصصة في ظبيط ريحة العروس والخمرة والدلكة الحريم النجاض يقولن اذا مأ جات ام الحسن ريحتكم تكون راحت شمار في مرقة.) ويعقب حاج الطاهر ؛_(كل مراءة ربنا خاليها فالحة في حاجة.. اسي حريمك الاتنين ياصديق كل واحدة فالحة فيشيء..واحدة ترزية مابتتصاقع مافي ترزي بخيط معاها..والتانية أن ظبطت لك اريق وله كداد تقطع اصابعينك فيه وكذابة مراءة تظبطه زييها)…وفجاءة يسمع صوت خارج الراكوبة (بيب بيب ..يون…يون) ويضحك صديق وهو يردد؛_(هيي هيي دة حس طبوج البوم يضرب في البوري بي خشمه ..يكون جاري ليه جريدة تمر عاملها عربية..اصله مش كان ذبحت ليك بهيمة..كان جرحت اصبعك تلقاه وصل يشم ريحة الدم دي من بعيد…التقول كلب بوليسي يكون اول حاجة مشى ناس داوود وعرف انه الفطور شالوه مرقوا ولا ينتظر انه يعرف شالوه ودوه وين..طوالي ركب جريدته قاصي درب التكتك…لمن فرمل هنا ..في طرف الراكوبة…بي حاسة الشم القوية يشغل دماغه لوكيشن عديل لمن الموقع وقفه فوق تكتك داوود بي ورى الراكوبة)
#ويواصل صديق وهو ينهض(أخير ادي مشوار اثبته لامن نفطر الاكل دة ياكل تاني قدرنا عشرة) ويخرج وهو يخاطب العوير طبوج البوم (شوف ياطبوج أنا ظابط لك صحن لحم تمام التمام بس عاوزك عشيقة واحدة ماتقيف الا في ابوقسي فوق بابور الكندوة وتلقى فرجاق قاعد جنب السواق تقول له صديق قالك ضروري يديك حبات عطلة تجيبا ليا ومن هناك تعشق عشيقة واحدة ماتقيف الا عندنا هنا في راكوبة حاج الطاهر دي..يلا) ويعشق طبوج بعد أن يحدث أصوات بنزين متكررة (يين يين ابيب تيت تيت)….ويعود صديق مواصلا لافطاره وهو يتحدث (اديته ليك مشوار لي بيارة الكندوة مشوار طويل وأنا عارفه كضاب بيلف يجي اسي…لكن بنكون فطرنا…قلت له امشي لي فرجاق قوله صديق قالك اديني حبة عطلة وعارفه بيلف يجي اسي هههههه)…يقاطعه حاج الطاهر (تم فطورك..أنت اجتماع اللجنة الأمس طلع بي شنو)؟ فيجيبه صديق(يازول والله جنى ود نافع النضام داك برا لك ناس اللجنة ديل جنس بري..واحد ماقدر يفتح خشمه ..قالهم الناس مالاقية تاكل تتكلموا في ضريبة الزراعة..الجماعة طوالي جروا واطي وخفضوا ليك الضريبة خمسين % الحمدلله)…
#وقبل أن يهموا بالقيام من تناول الإفطار عادت أصوات طبوج وبوريه….وأنا اضحك(طبوج تقولوا عليه بوم..اهو كسر ليك ركبة قدام راكوبة حاج الطاهر ) وهو يصيح…بيب بيب ييب وهو يصيح …(يلا ياصديق…طبوج جاكم.)…ويطمنه صديق (تجي طوالي صحنك جاهر بس قريش عربيتك ..واربط جريدتك دي وتعال داخل طوالي)..وانا اختم (ربنا يكرمك في الدارين ياشيخ داوود)ويردد داوود (جمعا ..خيرك سابق يادكتور الله يكرمك). وبعد أن يمسح صديق يديه بمنديل ورق وهو ينظر وكأنه يتميز اناس قادمين ..ثم يضحك وهو يصيح ؛_( الله لاقلاها عليك ياطبوج سائق لك معاك كورجا .. شلة عازفين من المعتوهين الرمتانين هههههه كاشيهم وراك فرقة حسب الله ههههه..غايتو مع فرقة طبوج دي بت عبيد مامحتاجة تغسل تاني عدتا دي هههههه بنظفوها ليها كويس )ونكتفي بهذا القدر الى أن. نلتقي في الحلقة (62) لكم كل الحب…زكي مكي اسماعيل
