صحيفة سودان بيزنس الاقتصادية صحيفة سودان بيزنس الاقتصادية
حلقات وجدانية بحتة توثق للرحيل المر لاهلنا بالخرطوم والمدن الاخرى بعيدا عن السياسة.
ا.د.زكي مكي اسماعيل أن وعد الله حق لامحالة وان بعد العسر يسرا أن شاء الله سوف تلتئم جروحنا وتنعم خرطومنا وينعم ايضا كل ربوع الوطن بالامن والسلام وسوف تنجلي هذه الغمة أن شاء الله …ولاشك ان ليل الظلام قصير وان طال امده… وان نصر الله ات لا محالة ..هكذا علمتنا عدالة السماء بان لكل ظالم نهاية مهما طال بقاؤه…واننا أن شاء الله سوف نعود لبيوتنا..وان الله يمهل ولا يهمل…رب اجعل ايام الحرب السود هذه ومالاقينا فيها من معاناة في ميزان حسناتنا..وارحم اللهم من ضحوا وزهقت ارواحهم فيها وعافي من اصيبوا. فيها..انك على كل شيء قدير..ونلتقى مع من ظلمونا امامك يا عزيز يا مقتدر ويا من لا يظلم عنده حد..
#ما زلنا نتوقع بشريات النصر وسلامة العودة ونتلهف للقائها.
$ أخوتي واخواتي الاحباب التواصل كان كثيرا وحميميا هذه المرة ولظروف سفري وانتقالي من دولة لاخرى تأخرت عنكم هذه الحلقات اياما..لكني حشدت تواصل تلك الرسائل ليجد دوره في النشر.. بعضها معلقا على رواكيب حبيبنا بروف جاركيل (محومد ود جاركيل) وحديثه العذب الشجي ولنا معه عودة أن شاء الله ..واجلت كل المشاركات في هذه الحلقة الا أن رسالة واحدة ابت نفسي تاخيرها وهي رسالة من الأخ الاستاذ احمد محمد محمد صالح المنصوري..ابن استاذنا الجليل وناظر مدرستنا الدبة الاميرية الوسطى رحمه الله …والذي يحل ضيفا في هذه الايام الحرجة بمنطقة دنقلا..وكم يتلهف للقاء أبناء واصدقاء وطلاب والده المنصوري…وهو ايضا منصوري موقد نار…وارفق رقم هاتفه..وهذا قمة البر بابيه بأن يحب ويواصل احباب ابيه..وهواتفه مرفقة..وهي ضمن هذه الرسالة الوحيدة بهذه الحلقة..وكم سعدت أن اكون حلقة الوصل بينه وبين استاذنا الجليل الراقي دياب محمود دياب بدنقلا..والى عزيز ماسطر استاذ احمد المنصوري؛__
(اخي بروف زكي ما شاء الله رواياتك واسلوبك شيق وسلس فعلا أديب واريب بالإضافة الي انك شاعر مفوه. وبرغم جهلنا بكثير من الشخصيات (عدا بعض الاسماء التي سمعنا عنها من الوالد عليه الرحمة) لكنها تشدنا إليها ومن التعليقات والردود التي تصلك يتضح انك تربطهم ببعضهم البعض وفتحت لهم نافذة ومتنفس في هذا الزمن الصعيب وهذا لا يتسني الا لمن يملك ناصية البيان والقبول من الجميع امثالك، ادام الله عليك محبة خلقه.. ورد اسم جاركيل اسم سمعناه من الوالد، والله يا زكي اشتاق واتمني ان اقابل واتعرف علي كل من له صلة ومعرفة بالوالد عليه الرحمة. يا ريت تمدني بالذين بدنقلا او بالقرب منها للتواصل معهم ولو هاتفيا. لك الود كله.والسلام عليكم.. تحياتي..”و ارقام تواصلي هي(٠١٢٦٠٩٩٢٩٨ مكالمات+واتس) (٠٩١٨٢٧١٢٢٣ مكالمات) علما بأن شبكة سوداني هنا اقوى…. عاطر تحياتي. اخوك احمد محمد محمد صالح المنصوري)…
التحيةللأخ الاستاذ احمد محمد محمد صالح المنصوري..والذي احسب انه أبنا بارا بوالديه..وان كان ابيه المنصوري رحمه الله رجلا عاديا لكان استاذ احمد درس معنا بالدبة وكنا بالطبع نعرفه منذ سنوات الدراسة…الاستاذ المنصوري الاب رحمه الله عمل مديرا(ناظرا) للمدرسة الاميرية الوسطى بالدبة لسبع سنوات امضاها عازبا وزوجته وابنائه ببلدتهم بالكاب شري…وامضى كل سنواته تلك يذهب لهم بالاجازات..وضحى بأبقاء زوجته وابنائه ليكونوا برفقة والديه ” الكبار في السن”…انها تضحية يصعب أن يقوم به رجل عادي..لله درك ليها المنصوري رحمك الله..ونشهد نحن الان ببر ابناءك بك…اكرمك الله استاذ احمد وبرك ايضا بأبنائك..وقد علمنا ابوك بسلوكه التربوي ذلك كيف نبر والدينا…لله دركما الوالد الأب والابن استاذ احمد وابنائه…
##ونفرد باقي الحلقة لقضائها براكوبة ومنزل حاج الطاهر.
#ها نحن نهم بالخروج من راكوبة نيمة حاج الطاهر وقبل أن يغادرها ثلاثتنا نسمع صياح هتراشة من بعيد تكورك مع زول لم نستدرك من هو لكننا بوضوح قد سمعنا كلماتهاوهي تخاطب من معها قائلة؛_(هيي كدي خلني من كلامك المافيوه ثمرة دة ..عليك الله ياجادين أنت الترزي الخيط لك العراقي دة..بلحيل غلطان السوالك جيوب في عراقيك دة وحات شيخي ابحجباتن سبعة اليوم الاشوف لي فرد فرطاقة جنيه في جيوبك التلاتة ديل الا اطق الزغاريت من راكوبة حاج الطاهر دي لامن امرقا في جريف العونية واجي مبحري لامن امرقا في كنكلاب ازغرت كدي ايوي ايوي ايوي واليسعلني كله اقوله الليلي شفت لي جنيه ورقة في جيب جادين ود كلتوم ..وان كان مو جايب له شيء الجنيه و لا كيس الصعوط.. مابيجيبه كيس شنو فليلي فليلي وحات كندمر سفة فرد وحدي مو جايبها.. وطبوج البوم أن مديت له الجنيه يفلعك بالحجار….خلني يامسنوح الالحق حاج الطاهر والبنفستور يوروني منامي دة…
#حاج الطاهر يهم بالدخول بصحبتنا الى داخل منزله..وصديق ينبهنا بان هتراشة قادمة الينا قائلا؛_
(” ماجاتكم راحة”..)..ويعلق حاج الطاهر؛_(أنا بخليها تدخل تهضرب بي جوة مع ام الحسن لامن نخلص من حجة داوود كبوش دي)..تصل هتراشة ويسبقها صوت حذائها وهي تبرطش(طبجك طبجك طبجك) وهي تمشي كالذي يتخبطه الشيطان من المس… ويهمس صديق في اذني “يابروف لاقتك عليك الله مراءة اشنى من هتراشة دي”؟ فقلت له ؛_(بجد ياصديق..دي فظيعة خالص…لكن تحفظ لكم التوازن في البلد مع ناس (جات تتدلى في الوديان عديلة..وتمشي قدم قدم في المشية ريلة)..زي ماقال ود خالتي صابر ع الله ..الله يرحمه…ويؤكد صديق(لكن يابروف فعلا فظيعة..كان نعقدا ليك بعد العمدة دي تتفجا مننا)..فاقاطعه؛_(يعقدك فكي جاقوم…ماتعقدا أنت لي رقبتك..أنا اقولك فظيعة خالص تقول لي نعقدا ليك )وهنا تصيح هتراشة ؛_(هوي هوي سلام ياحاج الطاهر..سلام يا البنفستور سلام ياصديق) ويناديها حاج الطاير (حبابك ياهتراشة المراءة الصالحة) فترد عليه(يصلح عملك ياخوي امس شفت لي منام قلت الا امشي لي حاج الطاهر والبنفستور يشوفوا لي )..فيحدثها حاج الطاهر ؛-(ابشري اللهم اجعله خىر..بس نحن عندنا شغلة لامن نقضاها انتي تضربي غلبة مع ناس ام الحسن جوة بعدين نشوفه ليك) فتؤكد هتراشة(كلامك عديل..تشوفك العافي) ويقاطعها صديق(والله ياهتراشة قالوا حلم الجعان عيش يكون شفتيلك عريس..نباركوا ليك طوالي) ..فردت هتراشة ضاحكة؛_(هيي هيي يباركولك كديس الخلاء..ياصديق اخوي) وضحكنا معها وأنا…سرحت مع كلماتها (يباركولك كديس الخلاء)..وهمست في سري(المراءة دي طاشة شبكة وله شنو..كلام دة خارم بارم ..وخارج الشبكة)….ونحن في طريقنا الى حوش حاج الطاهر..
#ودخلنا البرندة وجلس ثلاثتنا وتحدث صديق ساخرا (الليلة ياحاج الطاهر الله يقدرنا ندخل الجمل دة المركب مايقلبا لينا)..ويكمل حاج الطاهر (هو جمل يدخله المركب وله تورا هايج عاوزين يذبحوه)..واتدخل متفائلا ؛_ (ياجماعة اتفاءلوا الخير..أنا جارلكم السبحة بالصلاة علي النبي…الاصعب منه طوعناهم…أن شاء الله يتجاوب معانا)..هنا نسمع طرقا علي الباب وصفيق ايدي مرددا “أهل البيت سلام”…”سلام”..
#وينادي حاج الطاهر (مرحب داوود اتفضل اتفضل ..ادخلوا)..
يدخلون ويجلسوا داوود وابنه العطا وبعد تبادل التحايا والسؤال…يفتح حاج الطاهر الكلام مبتداءا (يا ام الحسن ..عليك الله خلي وحدة من البنات تظبط لينا شاي…داوود..اخوي والدكتور وصديق وياولدي العطا…كدي صلوا علي النبي.. “يرددون الصلاة علي النبي”…ويواصل ..
“وزيدوا النبي صلاة”..ويرددوا من جديد” ألف عليه قليل”..ويواصل حاج الطاهر(أن شاء الله جلستنا دي مباركة..وتكون ساعة خير وبركة نطلع منها متعافين وراضين كلنا يارب) ويرددوا “أن شاء الله”ويواصل حاج الطاهر (ياداوود ياخوي نحن جبناك هنا الحقيقة اولاد اخوك واخونا جابر رحمه الله جوني هنا وقالوا مستحين يتكلموا معاك في موضوع الورثة وظروفهم زي ماشايفه الله يعينهم …وانا وعدتهم خير قلنا نتكلم معاك نشوف رايك شنو؟)..ويتحدث داوود ؛_(ياحاج الطاهر ياخوي مامنك مدسة …جابر اخوي دة الله يرحمه من صغير مرق طفش من البلد وابى يقعد يخدم معانا وفاتنا حوفا…وابوي زعل منه ..وقطعا في مصارينه وأنا وابوي ياهو كربنا بطنا ووقفنا فوق الأرض دي والأرض كانت كتيرة وكبيرة والساقيتين في النقعة وفي العقبة .كان كتار علينا….والشغل والتعب هدانا هد..”وهنا يتعبر ويبكي داوود” ويغلبه الكلام ثم يستغفر…ابوي مرض ..مرض ياحاج الطاهر من التعب والمرض بقى له سبب موته..الله يرحمه…وبعد شوية بقت ايدي وحدي مرقت العطا دة من المدرسة فشان يقيف معاي في الزراعة ..علمتوا الدردرة واللحلحة والشقاوة…والله هو عمره تسعة وعشرة سنة شقوق كرعينه كانن يدخلن الضب من خواضة الموية والقراعة في الشتاء الاربعاني..وان قلت لك لدغ ميتين مرة يكون زيادة لامن جسمه أخد مناعة من لدغي العقارب..)…(هسع ولاد جابر اخوي الملس ديل جايين تكنوا يقسموا ورثتهم في ابوهم من شقانا..لا والله والواطة الفاضي راقدي أن عاوزين فوق حق ابوهن انابديهم..الا المرقتوا أنا وعطا ولدي يبقالهم قدحة مابيشموا..الا راسي دة يبقي فاخورة ساكت)
ويواصل داوود (والكلام قصره ياحاج الطاهر الأرض الفاضي راقدي وبديهم زيادة علي حقهم من حقي)..ويجيبه حاج الطاهر(نحن عشمانين ياداوود تديهم في النجيض المثمر دة) فيواصل ؛_ (أن بقى ” راسي دة فاخورة ساكت”.. بديهم من المثمر دة .. اييي راسي دة ان بقى فاخورة ساكت..يجوا يشيلوا العاوزنه من المثمر…)فيقاطعه صديق (كدي خلني ياداوود من راسي دة وفاخورة ساكت..)فيواصل داوود؛-(قلتكم يا رجالة ولاد اخوي ديل.يا ياخدوا من الأرض الفاضي في ساقية العقبة..يا يبقى راسي دة فاخورة ساكت..وقت اديهم من العمرته) ثم ثانية يقاطعه صديق؛_-(خلني ياداوود من راسي دة يبقى فاخورة ساكت)..هنا يهيج داوود وينهض ويمسك بجنبات كرسي الحديد ويصبح متجها الى صديق؛_( علي الطلاق بالتلاتة تزيد كلمة واحدة ياصديق تاني ..تعرف عقيل..سمعت بي د عقيل.. وتردد لي راسى دة يبقى فاخورة ساكت..اشرحك واخليك متل ضلع المناسبات بالكرسي دة واكمل الباقي بي سكيني ..قلتلك طلاق بالتلاتة ..واحيض دم متل العوين أن ماشرحتك وفجخت لك فاخورتك دي..ما اكون داوود كبوش)وهنا انهض أنا واقفا وينهض حاج الطاهر واتحدث بهدوء (ياداوود صديق دة ماغلط عليك بي حاجة ..صلي على النبي ..اقعد ياراجل..استهدىء بالله) ثم يضرب حاج الطاهر يديه كفا بكف قائلا؛_(افيي عليك ياداوود..افيي عليك…صديق جايي يحل مشكلتك أنت واخوك ..دة جزاه)؟!.داوود يرتجف وابنه العطا يمسك بقوة بالكرسي حتى لا يستطيع ايوه تحريكه….ويجلسوا جميعا ويقوم داوود ويرمي الكرسي من يديه ثم يقبل راس صديق قائلا؛_(اعفى لي ياصديق..الله ينعلك يا ابليس..الله ينعلك يا ابليس..اعفى لي ياصديق ياخوي)..هنا يضحك صديق ويقول ؛_(والله أنا اتشهدت..قلت الزول دة اتلبش كدي بيلحسني في ثانية..لكن ركزت. يابروف..روحي دي رياضية كيف).. وقبل اختم ادعوكم معي بالدعاء والتبرك معي بدعوات ابنتي ابرار لي والبارة كأسمها…والى دعواتها لي؛__
(“ان شاء الله يااا ابوي تشتغل وتتيسر امورك وربنا يفجها منك ويفرجها عليييك ويديك العافية يارب العالمي ابرار)…اامين يارب العالمين..الحمدلله الاسمع في دعواتكم ليا وأنا حي..دة من صلاحكم..
@ويلاحظ اني لم أزين هذه الرسالة بمكان ولا رقم هاتف.. واقضوا حوائجكم بالكتمان…موفقين أن شاء الله..دعواتكم..
والى أن نلتقي في الحلقة القادمة..(60) بمشيئة الله لكم كل الحب……زكي مكي اسماعيل…
…
..
